“Porti i ri i Durrësit, jo lojë politike”, Balluku: S’mund të ndërtohet me PPP

Ministrja e Infrastrukturës dhe energjisë, njëherazi zv/kryeministrja Belinda Balluku tha në fjalën e mbajtur këtë të enjte në seancën plenare se porti i ri tregtar i Durrësit nuk duhet kthyer në lojë politike.

Ajo shtoi se duke qenë se Porto Romano nuk do të jetë vetëm zonë detare-tregtare, por do të jetë dhe një zonë militare, duke iu referuar projektit të prezantuar në NATO, ajo nuk mund të ndërtohet me PPP, siç ishte parashikuar më herët

“Ishte parashikuar qe ky port të bëhej me kredi, por po ta kishim dhënë me PPP, ju do ishit sot duke na akuzuar për shitje të vendit. Ju keni dëgjuar shumë mirë prej dy vitesh që ajo zonë nuk do të jetë vetëm zonë detare-tregtare, por do të jetë dhe një zonë militare, e cila është dizajnuar tashmë dhe ka një koordinim. Ne e kemi njoftuar këtë publikisht pasi kemi bërë prezantimin në selinë qendrore të NATO-s.

Kemi të bëjmë me aset publik që nuk mund të ndërtohet me PPP dhe nuk mund të jepet me koncesion palëve të tjera pasi është një aset kombëtar i një rëndësie të veçantë ashtu siç ka ndodhur dhe me asete të infrastrukturës kritike”,-tha Balluku.

LEXONI GJITHASHTU:

• “Pazar i heshtur”- Basha: Vendimet merren jashtë Parlamentit, kundër shqiptarëve
• “Heshtja është pazar”- Alibeaj: Parlamenti të nxjerrë produktin e ‘Zgjedhores’