Poster gjigant dhe flamuj amerikanë, atmosfera për vizitën e Blinken në Tiranë

Të enjten e 15 shkurtit për herë të parë do të vizitojë Shqipërinë Sekretari Amerikan i Shtetit Antony Blinken.

Një ditë përpara se të marrë pjesë në konferencën e sigurisë në Mynih, zyrtari amerikan do të ndalet për disa orë në Tiranë, për t’u larguar po atë ditë nga vendi ynë.

Një ditë përpara kësaj vizite të rëndësishme, rrugët e kryeqytetit janë veshur me flamuj amerikanë dhe shqiptarë, ndërkohë që një poster gjigant i sekretarit amerikan të shtetit është shpalosur tek Universiteti Politeknik.

Euronews Albania ka mësuar se në vizitën e tij të parë në kryeqytetin shqiptar, Blinken do të takohet me kryeministrin Edi Rama, me të cilin më pas mund të ketë një konferencë për shtyp.

Departamenti Amerikan i Shtetit zhvilloi një ditë më parë një bashkëbisedim me gazetarë shqiptarë dhe gjermanë në lidhje me vizitën e Sekretarit Amerikan të Shtetit Antony Blinken fillimisht në Shqipëri dhe më pas me prezencën e tij në Konferencën e Sigurisë në Mynih.

Gazetari i Euronews Albania, Ardit Hoxha, i pranishëm në bashkëbisedim, bëri me dije detajet e dhëna nga përfaqësuesit e lartë të DASH, si Ndihmës Sekretari Amerikan i Shtetit për Europën dhe Euroazinë James O’Brien, dhe ish-ambasadorja Yuri Kim, në cilësinë e Zëvendës Asistentetes të Sekretarit Amerikan për Europën dhe Euroazinë.

Ish-ambasadorja Kim tha se vizita e sekretarit Blinken në Shqipëri do të zgjasë rreth 8 orë dhe në fokus do të jetë e ardhmja e Shqipërisë dhe Ballkanit Perëndimor.

LEXONI GJITHASHTU:

• Rama në Bruksel 1 ditë para vizitës së Blinken, takon Michel dhe Von der Leyen
• Gazetari: Pse nëse Blinken takon Dumanin është goditje për të gjithë klasën politike