Vangjel Tavo paraqitet në SPAK: U thirra për një kallëzim që kam bërë

Prefekti i qarkut të Vlorës, Vangjel Tavo, është paraqitur këtë të martë në Prokurorinë e Posaçme anti-Korrupsion.

I pyetur nga Euronews Albania, Tavo ka thënë se është thirrur për një kallzim penal që ai vetë ka bërë në vitin 2021.

Mësohet se kallëzimi lidhet me krime zgjedhore, por ende nuk dihen detajet e plota të personave të denoncuar nga prefekti.

Vangjel Tavo u rikthye në politikën aktive në mars të këtij viti duke marrë postin e prefektit të Vlorës. Ai zëvendësoi në atë detyrë Flamur Mamaj.

Tavo ka qenë deputet i qarkut të Gjirokastrës në disa legjislatura, si dhe ka mbajtur postin e ministrit të Shëndetësisë në vitet 2012-2013.