Prej 2 vitesh jeton në çadër, Shpresa Guci tregon vështirësitë pas tërmetit

Shpresa Guci bashkë me familjen e saj kërkojnë një shtëpi, pasi banesa e mëparshme e tyre u dëmtua nga tërmeti.

Të dyja të këto vajza të vogla janë mbesat e Shpresa Gucit nga Rrashbulli i Durrësit, një prej mijëra familjeve të goditura nga tërmeti i 26 nëntorit të vitit 2019.

Megi bashkë me nënën e saj janë larguar jashtë vendit, ndërsa Samanta prej dy vitesh jeton herë në këtë çadër dhe herë në këtë kontejner.

E vizituam fillimisht Shpresa Guxcin një vit më parë, por fatkeqësisht shohim se situata për të thuajse nuk ka ndryshuar.

Bashkë me vajzën dhe mbesën e saj nuk jetojnë më në çadër, ku kaluan rreth një vit, por në këtë kontejner, dhuratë nga Kisha Katolike. Shpresa nuk është vetëm e pastrehë. Mjaft të vështirë e ka dhe sigurimin e jetesës

“Jetoj me ndihmë ekonomike, 39 mijë lekë të vjetra”, tregoi ajo.

Nëntorin e kaluar ndërsa Euronews Albania ishte në çadrën e saj,  Shpresa na tregoi peripecitë  e saj për t’u pajisur me dokumentacionin e duhur për të përfituar nga programet e  rindërtimit

“Erdhën NA thanë banesave e pabanueshme. Pastaj më thanë DS2. Do aplikoni prapë më tha administratori, aplikova prapë”, tregoi ajo.

Sot shtëpia e saj ende nuk ka nisur të rindërtohet, ndërsa Shpresa tregon se bonusi i qirasë nuk ishte zgjidhje që funksionoi për të.

“U bë 4 muaj që skam marrë bonus”, tregon ajo.

Ajo kthehet herë pas here në shtëpinë që pret t’i rindërtohet dhe ndërmend sjell atë që përjetoi natën e 26 nëntorit.

“Ka qenë e tmerrshme, çfarë binte jashtë binte brenda. Dy javë kam fjetur në rrugë”, tregoi ajo.

E mësuar me vuajtjet me të cilat e ka përballur deri tani jeta, Shpresa duket se nuk ka me shumë shpresë se situate e saj do të përmirësohet  por lutet për një të ardhme më të mirë  për mbesën e saj.