Presidenca në Kosovë thotë se nuk ka marrë asnjë letër nga Kuvendi

Presidenca e Kosovës nuk ka pranuar deri më tani asnjë letër nga Kuvendi, ka thënë këshilltari për media në Zyrën e presidentes së Kosovës, Bekim Kupina.

“Deri më tani nuk ka arritur asnjë letër nga Kuvendi. Para përgjigjes duhet të vijë pyetja”, tha ai kur u pyet lidhur me këtë çështje nga KosovaPress.

Kryesuesi i seancës konstituive të Kuvendit të Kosovës, Avni Dehari, me rastin e ndërprerjes së seancës, ka thënë se do t’i drejtohen me një letër presidentes Vjosa Osmani, shkruan KosovaPress.

“Në këto rrethana detyrohemi ta ndërpresim seancën dhe me një letër të njoftojmë presidenten se si do të veprohet në të ardhmen”, tha ai.

Seanca e sotme për konstituimin e Kuvendit të Kosovës u ndërpre për shkak të mosmiratimit të raportit të Komisionit për verifikimin e mandateve.

Mos votimin e raportit të Komisionit për verifikimin e mandateve dhe kuorumit, kryetari i Lëvizjes Vetëvendosje, Albin Kurti e ka cilësuar “sulm brenda institucional kundër Republikës së Kosovës dhe zgjedhjeve demokratike”.

Ishin 52 deputetë për, 46 kundër dhe 11 deputetë që abstenuan të martën.

Partia Demokratike e Kosovës, Lidhja Demokratike e Kosovës dhe Aleanca për Ardhmërinë e Kosovës kanë votuar kundër raportit të komisionit të përkohshëm.

Ndërkaq, pro këtij raporti kanë votuar deputetët e Lëvizjes Vetëvendosje dhe te Nismës.

LEXONI GJITHASHTU:

• Seanca plenare në Serbi, Macut flet për Kosovën: Sfida për qeverinë e re
• Orban: Integrimi i Ukrainës në BE do të pengonte zhvillimin e Hungarisë