‘Presidenti’, Agalliu: Shumica e deputetëve në PD, pro përfshirjes në proces

Deputeti i Partisë Demokratike Arbi Agalliu deklaroi se shumica e kolegëve demokratë kanë shprehur qëndrimin e tyre për të marrë pjesë në procesin e zgjedhjes së presidentit të ri.

Për “Euronews Albania”, Agalliu u shpreh se qëllimi i opozitës është që të përfshihet në çdo proces.

“Shumica dërmuese për mos të thënë të gjithë deputetët e PD janë për marrjen pjesë në proces. Koha kur nuk merrej pjesë në proces, duhet të jetë një kohë e shkuar. Qëllimi i opozitës është të përballet në procese”, tha ai.

Agalliu tha se një javë më parë, 22 deputetë të Grupit Parlamentar u mblodhën dhe shprehën mendimet e tyre nëse do të marrin pjesë në proces dhe cilat do të jenë kritret që do duhet të plotësojë presidenti i ri.

Ai bëri me dije se deputetët kishin afat deri mbrëmjen e djeshme për të dhënë mendimet e tyre dhe bazuar në to, është krijuar një draft ku janë vendosur kriteret që duhet të plotësojë presidenti i ri.

Kreu i Grupit Parlamentar të Partisë Demokratike, Enkelejd Alibeaj ka thirrur sot mbledhjen e deputetëve për të diskutuar për procedurën e zgjedhjes së kreut të shtetit. Takimi i deputetëve demokratë është njoftuar në orën 14:00.

LEXONI GJITHASHTU

• ‘Rithemelimi’: Dokumenti me kriteret për presidentin, marrëveshje Rama-Basha

• Salianji: ‘Rithemelimi’ të përfshihet në bisedimet për presidentin e ri