Presidenti Begaj dekreton 7 ambasadorët e rinj, në Kosovë emërohet aktori i njohur

Presidenti i Republikës, Bajram Begaj dekretoi këtë të enjte lirimet dhe emërimet e Ambasadorëve të Republikës së Shqipërisë.

Bëhte me dije se Qemal Minxhozi është liruar nga detyra e Ambasadorit të Jashtëzakonshëm dhe Fuqiplotë të Republikës së Shqipërisë në Republikën e Kosovës. Në vend të të tij është emëruar aktori i njohur Petrit Malaj.

Ish-zv.drejtori i SHISH Oljan Kanushi, është caktuar ambasador i Republikës së Shqipërisë në Slloveni, duke zëvendësuar në këtë post Pëllumb Qazimin, i cili është liruar nga detyra.

Sakaq, Saimir Bala është liruar nga detyra e ambasadorit të Shqipërisë në Shtetin e Kuvajt dhe Irak dhe në vend të tij është emëruar Ilir Hysa.

Ilirian Kuka është liruar nga detyra e Ambasadorit të Jashtëzakonshëm dhe Fuqiplotë të Republikës së Shqipërisë në Republikën e Çekisë. Në këtë ambasadë është emëruar në detyrë Ilir Tepelena, i cili më herët ishte ambasador në Rumani.

Në ambasadën e Rumanisë është caktuar ambasadore Enkeleda Mërkuri, e cila më herët ishte ambasadore e Shqipërisë në Republikën e Sllovakisë.

Elida Petoshati është liruar nga detyra e Ambasadorit të Jashtëzakonshëm dhe Fuqiplotë të Republikës së Shqipërisë në Mbretërinë e Danimarkës, dhe në vend të saj është emëruar Sokol Dedja.

Presidenti Begaj ka dekretuar gjithahstu lirimin e Shpresa Kuretas nga detyra e Ambasadorit të Jashtëzakonshëm dhe Fuqiplotë të Republikës së Shqipërisë në Republikën e Polonisë, Estonisë, Letonisë,  Lituanisë dhe Ukrainës. Në vend të saj është emëruar Mimoza Halimi.

LEXONI GJITHASHTU:

• Presidenti Begaj dekreton lirimin nga detyra të zv.drejtorit të SHISH
• Tensionet në Veri, Vuçiç me ambasadorët e Quint-it, BE-së, Rusisë dhe Kinës