Presidenti Begaj dekreton datën e zgjedhjeve për Bashkinë Himarë

Presidenti i Republikës, Bajram Begaj, ka dekretuar datën 4 gusht për mbajtjen e zgjedhjeve në bashkinë Himarë.

Vendimi erdhi pasi qeveria iu drejtua me një letër zyrtare Presidencës, ku i komunikonte vakancën e krijuar në drejtimin e Bashkisë Himarë, pas vendimit të KQZ për heqjen e mandatit të Fredi Belerit.

Pas një konsultimi me kreun e KQZ Celibashi, Begaj zgjodhi datën 4 gusht, si datën më optimale brenda afatave ligjore për mbajtjen e zgjedhjeve.

“Kryetari i zgjedhur i bashkisë Himarë është gjendur nga Komisioni Qendror i Zgjedhjeve në kushtet e pavlefshmërisë së mandatit, për shkak të dënimit me vendim të formës së prerë për veprën penale të “korrupsionit aktiv në zgjedhje”, të parashikuar nga neni 328 i Kodit Penal të Republikës së Shqipërisë.

Presidenti i Republikës, Bajram Begaj thirri në konsultë Ilirjan Celibashi, Komisioner Shtetëror i Zgjedhjeve për t’u informuar lidhur me kapacitetet dhe gadishmërinë e institucionit menaxhues të zgjedhjeve, për zhvillimin e zgjedhjeve në këtë bashki, brenda kornizës kalendarike të Kodit Zgjedhor.

Pas kësaj konsulte, Presidenti i Republikës, Bajram Begaj dekretoi datën 4 gusht 2024 për zhvillimin e zgjedhjeve për kryetar bashkie në bashkinë Himarë, si alternativa më e mirë që pajton nevojën për përgatitjen dhe zhvillimin e një fushate të rregullt zgjedhore dhe nevojën për përgatitjen optimale të administratës zgjedhore, me kushtet, rrethanat dhe ngarkesën që sjell sezoni turistik për bashkinë Himarë, si njësi bregdetare e qeverisjes vendore”, thuhet në njoftimin e Presidencës.

Kujtojmë se mëngjesin e kësaj të premteje KQZ shpall pavlefshmërinë e mandatit të Belerit, nën argumentin se preket nga ligji i dekriminalizimit pas vendimit të formës së prerë të Apelit të Posaçëm që e dënon me 2 vite burg për korrupsion në zgjedhje.

LEXONI GJITHASHTU:

• Qeveria shkresë Presidencës, kërkon të shpallen zgjedhje në Himarë. Datat e mundshme
• Beleri flet në KQZ për mandatin: Duhet të betohem pastaj të më shkarkojnë
• KQZ shqyrton mandatin e Belerit, avokatja Gjyzari: Procedura është e pavlefshme