Beleri flet në KQZ për mandatin: Duhet të betohem pastaj të më shkarkojnë

Kryebashkiaku i zgjedhur i Himarës, mbajti fjalën e tij këtë të premte në KQZ ku po shqyrtohet mandati i tij.

Ai tha se e njëjta metodë që u përdor ditën e sotme duke i mundësuar atij shkuarjen në zyrat e KQZ, mund të ishte bërë edhe që ai të shkonte e të betohej si kryetar i Bashkisë së Himarës. Sipas tij, ai duhet të betohet njëherë e më pas le ta shkarkojnë. Beleri tha gjithashtu se tashmë është e qartë që mandati i tij ka marrë fund, por kërkon respektimin e ligjit dhe kushtetutës.

“Ju falënderoj që më dhatë mundësinë  të shprehesha. Juristët dhe zoti Dule thanë shumicën e gjërave. Duket qartë se nuk ka bazë për shqyrtimin e sotëm. Dikush do të nxjerrë gështenjat nga zjarri me duart e KQZ. Institucioni që ju drejtoni është i vetmi që deri më tani ka ruajtur nderin e këtij shteti dhe ka qenë brenda kuadrit ligjor.

Të gjitha institucionet e tjera janë bërë pjesë e paligjshmërisë, paligjshmërive që më janë bërë mua dhe një pjesë të të banorëve të Himarës që më kanë votuar. Si erdha sot këtu, mund të kisha shkuar 2 orë në Himarë e të isha votuar. Vullnet politik ishte sot, këtë leje mund ta merrja edhe për të bërë betimin.

Ata që vendosën rëndimin e Bashkisë së Himarës, dhunimin e votës së sovranit, ata që nuk duan që himarjotët të shprehen, duhet ti lini të pinë gotën e helmit deri ën fund. Unë duhet të betohem dhe të më shkarkojnë, siç e thotë ligji dhe kushtetuta. Është e qartë që mandati im si kryebashkiaku i Himarës ka mbaruar. Unë u flas se ata do e bëjnë rrugë, do bëjnë zgjedhje në mes të gushtit, në Himarë ky është muaji ku nxjerrin të ardhurat e gjithë vitit. Kanë dy kryetar bashkie në mënyrë të paligjshme”,-tha Beleri.

LEXONI GJITHASHTU:

• Mandati i Belerit, Dule në KQZ: Sot doni të përmbyllni rrëmbimin e Bashkisë Himarë
• KQZ shqyrton mandatin e Belerit, avokatja Gjyzari: Procedura është e pavlefshme