Presidentja Osmani merr letër nga Trump: Një mike e vërtetë e SHBA-ve

Presidentja e Kosovës, Vjosa Osmani, ka pranuar një letër nga Presidenti i Shteteve të Bashkuara të Amerikës, Donald Trump, në të cilën ai e falënderon për lidershipin e saj të guximshëm dhe e cilëson si një “mike të vërtetë” të Shteteve të Bashkuara.

Në letrën zyrtare, Presidenti Trump shpreh mirënjohjen e tij për përkushtimin e Presidentes Osmani ndaj marrëdhënieve me SHBA-të dhe thekson vendosmërinë e Kosovës për të bashkëpunuar ngushtë me Uashingtonin.

“Vendimi për të pranuar shtetas nga shtete të tjera tregon gatishmërinë e fortë të Kosovës për të bashkëpunuar me Shtetet e Bashkuara të Amerikës,” shkruan Trump, duke shtuar se “lidershipi në këtë çështje tregon fuqinë dhe dhembshurinë e popullit të Kosovës.”

Presidenti amerikan nënvizon lidhjet e veçanta mes dy vendeve, të ndërtuara mbi “respektin e ndërsjellë, vlera të përbashkëta demokratike dhe një vizion për një të ardhme paqësore dhe prosperuese.”

 “Përkushtimi juaj për forcimin e kësaj lidhjeje nuk ka kaluar pa u vërejtur, dhe jam i bindur se së bashku do të vazhdojmë të avancojmë qëllimet tona të përbashkëta.”-thuhet në postimin e presidencës.

Duke e falënderuar për angazhimin dhe udhëheqjen, Trump thekson se e sheh Presidenten Osmani si një partnere të rëndësishme.

“Ju falënderoj sërish për lidershipin tuaj të guximshëm dhe për faktin që qëndroni si një mike e vërtetë e Shteteve të Bashkuara. Mezi pres të punojmë së bashku me ju në vitet që vijnë.”-thekson Trump në letrën e tij.

Në fund të letrës, Presidenti Trump përcjell edhe përshëndetjet dhe urimet më të mira nga Zonja e Parë e Shteteve të Bashkuara, Melania Trump.

LEXONI GJITHASHTU:

• Moskonstituimi i Kuvendit, Vjosa Osmani tërheq kërkesën e bërë në Kushtetuese
• Presidentja e Kosovës, Osmani: Thirrjet anti-shqiptare në Kumanovë, të papranueshme