Pas një njoftimi të IKMT për nisjen e prishjes së disa bujtinave në Theth, banorët dhe pronarët e disa prej këtyre njësive akomoduese u mblodhën në Qafën e Thorës për të protestuar.

Për rreth 1 orë banorët bllokuan rrugën duke mos lejuar kalimin e automjeteve si dhe turistëve të shumtë që i ishin drejtuar Thethit.

Banorët shprehen të irrituar pasi para zgjedhjeve i është premtuar që do të marrin certifikatën e pronësisë.

“Ne protestojmë sot sepse flitet sikur po vijnë të na prishin shtëpitë. Ne kemi kërkuar të na japin tapitë e shtëpisë, e tokës që e kemi trashëguar. Ne nuk kemi zaptuar toka. Ne kemi shkuar tek prona e të parëve tanë. Kemi shkuar në pronat e të parëve. Ne po mbrojmë dhe po kërkojmë që shteti të na pajisë me tapi dhe ne të paguajmë të gjitha taksat,” – tha një i moshuar.

Nisur nga kjo protestë, bashkia Shkodër dakordësoi një takim me banorët duke anuluar aksionin e prishjes së objekteve.

Pas rreth 1 ore protestë, qarkullimi vijoi normalisht ndërsa punonjësit e IKMT dhe IMT së bashkisë Shkodër u kthyen në drejtim të qytetit.

Pak ditë më parë, 59-vjeçari Gjovalin Dreni u arrestua nga policia e Shkodrës pasi kishte shtuar objektin e tij pa leje në Theth për ta vënë në shërbim të turistëve ndërsa një tjetër shtesë hoteli në qendër të Shkodrës u çmontua nga IKMT duke proceduar pronarin.

LEXONI GJITHASHTU:

• IKMT njofton prishjen e bujtinave në Theth, banorët dalin në protestë
• Një martesë në Theth, çifti nga Gjermania thotë “Po” mes Alpeve