Prodhuesi turk: Fabrika në Kosovë do të prodhojë municione me standarde të NATO-s

Kosova ka nënshkruar një kontratë me prodhuesin shtetëror turk “Makine ve Kimya Endüstrisi” për ndërtimin e një fabrike moderne të municioneve, e cila do të prodhojë sipas standardeve të NATO-s.

Lajmi është bërë i ditur nga vetë prodhuesi turk përmes një njoftimi në rrjetet sociale, ku theksohet rëndësia e këtij projekti për forcimin e bashkëpunimit mes Turqisë dhe Kosovës.

Sipas MKE-së, kjo fabrikë jo vetëm që do të mbështesë zhvillimin e kapaciteteve mbrojtëse të Kosovës, por gjithashtu do të kontribuojë në rritjen e eksporteve të industrisë turke të mbrojtjes.

“Nënshkruam marrëveshje për themelimin e një fabrike moderne në Kosovë, që do të prodhojë municione sipas standardeve të NATO-s. Jemi krenarë që kemi kontribuar në eksportet e industrisë së mbrojtjes së Turqisë, duke forcuar vendin tonë mik dhe vëlla, Kosovën, me këtë kontratë të nënshkruar”, thuhet në deklaratën e MKE-së.

LEXONI GJITHASHTU:

• Kosova do të prodhojë dy lloj municionesh dhe do të dizajnojë dronë luftarakë
• Prodhimi i municioneve në Kosovë, ministri i Brendshëm zbulon detaje