Progni: Kryqëzimi i të dhënave bëhet vetëm nga titullari ose me urdhër nga lart

Në emisionin “Now” me Erla Mëhillin u diskutua se kush fshihet prapa publikimit të pagave të qytetarëve të Shqipërisë.

Eksperti i IT Gent Progni tha se vazhdon të jetë e paqartë se si kanë dalë këto të dhëna personale.

Ai u shpreh se përgjegjësia bie te Agjencia Kombëtare e Shoqërisë dhe Informacionit (AKSHI), duke thënë se të gjithë IT-të që punësohen në institucionet shtetërore certifikohen nga ky institucion.

“Janë të varur drejtpërdrejtë nga AKSHI, dhe drejtoresha e AKSHIT është e varur drejtpërdrejtë nga kryeministri”, u shpreh Progni.

“Nuk mund të themi që këto të dhëna kanë rrjedhë nga një i çmendur në tatime, apo një keqbërës në tatime, sepse këtu kemi një rrjedhje të dhënash ose kryqëzim të dhënash në më shumë se një server. Dhe ky centralizimi i më shumë se një serveri bëhet vetëm në AKSH”, tha Progni.

Ai shpjedoi se ka kryqëzim të të dhënave, dhe e cilësoi shqetësues daljen e tyre.

“Nuk mund të themi që rroga është marrë në një institucion, ndërsa targat në një tjetër dhe numri i telefonit në një vend tjetër dhe është bërë nga ky IT i tatimeve. Pra, ky grumbullim, ky kryqëzim i të dhënave është i frikshëm sepse mund të bëhet vetëm nga titullari i atij institucioni dhe me urdhrin e atij institucioni, në një zyrë brenda AKSHI-t që quhet zyra e ndërveprimit”.