Programi ekonomik i PD/ Berisha: Ulim naftën, taksa e pronës do të zbresë në 2%

Kryetari i Partisë Demorkaike, Sali Berisha, mbajti këtë të hënë një konferencë me gazetarët, ku shpalosi programin ekonomik të PD-së.

Berisha në fjalën e tij tha se nëse Partia Demokratike vjen në pushtet nuk do të taksojë biznesin e vogël dhe profesionet e lira. Gjithashtu ai tha se taksa për shitjen e pronave do të ulet nga 15% në 2%.

Sipas Berishës do të hiqet taksa ‘Rama’ e karburantit dhe karburantet nuk do të shiten në Shqipëri me një çmim që ndryshon +-10% nga ai i Kosovës dhe Maqedonisë.

“Pas një takimi frymëzues, mahnitës në stadiumin e Napolit, me mijëra qytetarë shqiptarë të diasporës në këtë qytet, kthehem më i inspiruar se kurrë në projektin tonë dhe konkretisht në shtyllën e tij të dytë, dhe themelore ‘Made in Albania’. Shtyllë e cila ka qëllime kryesore, prodhimin, prodhimin, prodhimin.

Që do të thotë punësim, punësim, punësim për shqiptarët.

Që do të thotë rritje rrogash, rritje rrogash, rritje rrogash për shqiptarët.

Pra, ne do të bëjmë gjithçka për të ndezur fuqishëm motorrët e sipërmarrjes së prodhimit në Shqipëri, me moton ‘Made in Albania’.

Duhet që prodhimet shqiptare të mbushin tregun shqiptar dhe të vërshojnë në tregjet e tjera.

Për këtë qëllim ne jemi të zotuar të garantojmë konkurrueshmëri të ndershme, me ligj dhe të sigurtë.

Të garantojmë nivelin më të ulët të taksave në Europë.

Të sigurojmë, derregullimin më të madh në interes të biznesit.

Të sigurojmë klimën më miqësore dhe kjo jo me fjalë, por me vepra, ligje, vendime konkrete.

Në këtë kuadër, do të zbatohet tatimi 10% mbi të ardhurat nga puna, duke përjashtuar 50 mijë lekët e para.

Tatimi 10% mbi të ardhura të tjera, jo nga paga.

Zero taksim mbi profesionet e lira dhe biznesin e vogël.

Tavani vjetor për tatim fitim, zero për biznesin e vogël, do të jetë 18 milionë lekë, apo 500 euro në ditë.

Kufiri i përjashtimit nga TVSH do të jetë po ashtu në masën 18 mln lekë xhiro vjetore, apo 500 euro në ditë”, tha Berisha.

Ulje nga 15 në 2 % të taksës së shitje së pronës dhe për këtë qëllim krijimi i kadastrës fiskale për përcaktimin e çmimeve të referencës.

LEXONI GJITHASHTU:

• Berisha shpalos programin e PD: Do t’u presim dorën atyre që prekin paratë publike
• “Vendi i Dash Sulës është në PD”, Berisha: Rama tregoi se Lapaj është patericë e tij