Progres raporti i BE: Shqipëria përparim të kufizuar në lirinë e medias

Bashkimi Evropian publikoi raportin e progresit për Shqipërinë, një dokument prej 102 faqesh që ofron një vlerësim të detajuar mbi ecurinë e vendit në implementimin e reformës në drejtësi, luftën kundër korrupsionit, zhvillimin e zgjedhjeve dhe fusha të tjera kyçe.

Sa i përket lirisë së mediave raporti thekson se “Shqipëria ndodhet ndërmjet një niveli të pjesshëm dhe mesatar përgatitjeje në fushën e lirisë së shprehjes dhe ka bërë përparim të kufizuar gjatë periudhës së raportimit”.

“Shqipëria ndodhet ndërmjet një niveli të pjesshëm dhe mesatar përgatitjeje në fushën e lirisë së shprehjes dhe ka bërë përparim të kufizuar gjatë periudhës së raportimit. Situata mbetet kryesisht e pandryshuar, me pavarësinë dhe pluralizmin mediatik që vazhdojnë të ndikohen nga mbivendosja e interesave politike dhe biznesore, mungesa e transparencës së burimeve të financimit, përqendrimi i lartë i pronësisë mediatike, frikësimet dhe kushtet e pasigurta të punës për gazetarët.

Nisma për një dialog të strukturuar midis institucioneve shqiptare dhe aktorëve të medias, si edhe miratimi i masave të buta për sigurinë e gazetarëve, përbëjnë zhvillime pozitive. Megjithatë, u ngritën shqetësime lidhur me ligjshmërinë dhe respektimin e procedurave gjatë dëbimit nga autoritetet të një mediaje nga ambientet publike që ajo përdorte”, thuhet në raport.

LEXONI GJITHASHTU:

• Raporti i BE: Arritje me votimin nga jashtë, problem polarizim i thellë
• Drafti i Raportit të Progresit: Kosova përparim të kufizuar, shkak ngërçi politik