Progres Raporti i KE-së, Mimi Kodheli: I qëndrueshëm, ka një progres të ngadaltë, por të mirë

Komisioni Evropian publikoi të martën progres-raportin për Shqipërinë, duke i dhënë një vlerësim pozitiv, por pa caktuar një datë për konferencën e parë ndërqeveritare për hapjen e negociatave midis Shqipërisë dhe BE-së.

Këtë raport, kryetarja e Komisionit për Politikën e Jashtme, Mimi Kodheli thotë se është i qëndrueshëm me një progres të ngadaltë, por të mirë.

“Unë e vlerësova të qëndrueshëm progres-raportin dhe kjo është një gjë shumë e rëndësishme”, u shpreh znj. Kodheli në studion e “Now” në Euronews Albania.

Mimi Kodheli e krahasoi rrugën e Shqipërisë drejt BE-së me historinë e breshkës e cila ecën avash, por mbërrin e sigurt në destinacion.

“Nuk kemi asnjë kthim mbrapa dhe asnjë pengesë që të mbërrijmë në destinacion”, tha Mimi Kodheli.

Ajo u shpreh se Shqipëria po bën një progres të ngadaltë por me konsistencë drejt BE-së, ku nuk ka ngecje apo hapa pas.

“Në raport me reformat kemi bërë hapa të mirë”, thekoi ajo, ku shtoi se sipas saj, duhet të ishte realizuar konferenca e parë ndërqeveritare.

Znj. Kodheli tha se Bashkimi Evropian ka qenë i pasigurt dhe i frikur, pasi ka pasur eksperiencë jo të mirë me prurjet e fundit në BE, “ndaj kanë zgjedhur të jenë më konservatorë dhe më të kujdesshëm”.