Prokurori italian zbërthen skemën se si vinin paratë e grupit të drogës në Shqipëri

Gjatë konferencës së përbashkët me SPAK-un për operacionin “Ura”, prokurori italian zbërtheu skemën e transferimit të parave nga Italia drejt Shqipërisë nga anëtarë të grupit kriminal.

“Së bashku kemi arritur të vëzhgojmë dhe dokumentojmë momente kur persona në Itali i dorëzonin shumat e parave agjencive të transportit që udhëtonin drejt Shqipërisë. Ky aktivitet ka lehtësuar shmangien e kontrolleve në kufi dhe ka mundësuar lokalizime me GPS dhe vëzhgime transkufitare”, tha prokurori.

Sipas tij, paratë e përfituara nga aktiviteti kriminal niseshin nga Bari dhe përfundonin në Shqipëri. “Nga analizimi i të dhënave në chat dhe fotografive në celularët e sekuestruar, rezultoi se përveç lëndëve narkotike, ishin të dokumentuara edhe shuma të mëdha parash. U gjetën gjithashtu edhe letra të shkruara me dorë, ku ishin mbajtur të dhëna financiare të aktivitetit të grupit”, theksoi ai.

Përmes këtij dokumentimi financiar, autoritetet arritën të rindërtonin fitimet për çdo ngarkesë droge dhe në bazë të tyre, u bë sekuestrimi i pasurive në vlerën e barabartë me dëmin penal të shkaktuar.

LEXONI GJITHASHTU:

• Detaje nga operacioni antidrogë, Mara: Qarkullonin 5 mln euro nga Italia në Shqipëri
• Dumani nga SPAK: Goditet një prej grupeve kriminale më të fuqishme në Shqipëri