Prokuroria dhe Policia e Kosovës zgjerojnë hetimet për manipulimin e rezultateve zgjedhore në Prizren

Prokuroria Themelore në Prizren njofton se, në bashkëpunim me Policinë e Kosovës, Drejtorinë për Hetimin e Krimeve Ekonomike dhe Korrupsion dhe Drejtorinë Rajonale të Policisë në Prizren, ka zgjeruar hetimet për grupin e dytë të të dyshuarve lidhur me manipulimin e rezultateve zgjedhore.

Pas pranimit të informatave publike mbi procesin e rinumërimit të rezultateve në Qendrën Komunale të Numërimit (QKN) në Prizren, janë intervistuar 28 të dyshuar dhe 6 dëshmitarë.

Pesë persona janë ndaluar për 48 orë me urdhër të Prokurorit të Shtetit: katër prej tyre, si kryesues të komisioneve, për dyshim për falsifikim të rezultateve të votimit sipas nenit 216 të KPRK-së, dhe një person, si Koordinator i KKZ-së për Komunën e Prizrenit, për dyshim për keqpërdorim të pozitës apo autoritetit zyrtar sipas nenit 414 të KPRK-së.

Prokuroria do të shqyrtojë brenda afateve ligjore kërkesën për caktimin e masave për sigurimin e prezencës së të pandehurve në procedurë.

Institucionet e drejtësisë njoftojnë se mbeten të përkushtuara në luftën kundër kriminalitetit dhe në sigurimin e sundimit të ligjit.