Prokuroria e Elbasanit nis hetimet  ndaj kompanisë Kurum për ndotjen e ajrit

Prokuroria e Elbasanit në bashkëpunim me policinë ka nisur hetimin kryesisht për ndotjen e ajrit ndaj kompanisë Kurum.

“Prokuroria pranë Gjykatës së Shkallës së Parë të Juridiksionit të Përgjithshëm Elbasan ka filluar hetimet kryesisht, duke regjistruar procedimin penal nr. 1309, datë 07.11.2023 për veprën penale “Ndotja e ajrit, e ujrave dhe e tokës” të parashikuar nga neni 201 i Kodit Penal, pasi u mor dijeni në lidhje me ngjarjen e datës 06.11.2023 ku në një masiv me skrap të ndodhur në ambjentet e brendshme të ish Kombinatit Metalurgjik Elbasan, të administruara aktualisht nga shoqëria “Kurum” ka rënë një zjarr me përmasa të mëdha që ka shkaktuar ndotje të madhe në mjedisin e zonave përreth dhe më gjerë në Bashkinë Elbasan. Për hetimin e këtij procedimi penal është ngarkuar një grup hetimor i përbërë nga dy prokurorë dhe tre oficerë të policisë gjyqësore të Prokurorisë pranë Gjykatës së Shkallës së Parë të Juridiksionit të Përgjithshëm Elbasan, të cilët në bashkëpunim me shërbimet e Policisë së Shtetit kanë kryer veprimet e para hetimore në kuadër të procedimit penal të sipërcituar, me qëllim zbardhjen e shkaqeve të ngjarjes së ndodhur”, thuhet në njoftimin e prokurorisë.

Edhe kryetari i bashkisë së Elbasanit, Gledian Llatja është shprehur se kushdo që për orë të tëra shkaktoi ndotje masive për qytetarët e Elbasanit duhet të mbajë përgjegjës.

Zjarri që nisi dje rreth orës 11:15, në një pikë për grumbullimin e skrapit, në Kurum vijon edhe ditën e sotme re duke çliruar re të mëdha tymi toksik në ambient prej 24 orësh.

LEXONI GJITHASHTU:

• Vijon prej 24 orësh zjarri në fabrikën Kurum, ndotje katastrofike në ambient
• VIDEO| Merr përmasa të mëdha zjarri në ambientet e Kurum