Prokuroria e Tiranës çon në gjyq 5 shtetas nga Kosova për kontrabandë ilaçesh

Prokuroria e Tiranës ka përfunduar hetimet dhe ka dërguar në gjyq pesë shtetas të Kosovës për veprën penale “Kontrabandë me mallra të licencuara” në bashkëpunim.

Shtetasit me iniciale A.M., B.Z., A.G., A.I., dhe F.Z., në dhjetor të vitit 2024, mbërritën nga Stambolli në Shqipëri në Aeroportin e Rinasit me 300,000 euro cash dhe 14 valixhe plot me medikamente të paautorizuara për tregtim në Shqipëri.

Pas kontrollit fizik të kryer nga Dogana dhe Policia e Rinasit, u sekuestruan gjithsej 1,057,840 medikamente, me mbishkrimin ‘Unified’, me peshë totale 417.1 kg, të cilat ishin të padeklaruara dhe pa licencë të rregullt tregtimi në Shqipëri. Gjithashtu, u sekuestrua një shumë prej 300,000 eurosh, që nuk ishte deklaruar siç parashikon ligji.

Hetimet e mëtejshme të Prokurorisë provojnë se të pestë personat e arrestuar kanë kryer veprën penale të kontrabandës me mallra të licencuara, duke përfshirë medikamentet, për të cilat kërkohet autorizim tregtimi dhe përdorimi, si dhe mbikëqyrje nga Agjencia Kombëtare e Barnave dhe Pajisjeve Mjekësore (AKBPM).

Prokuroria ka përfunduar hetimet dhe ka dërguar në gjyq shtetasit A.M., B.Z., A.G., F.Z. dhe A.I., të akuzuar për kryerjen e veprës penale “Kontrabandë me mallra të licencuara”.

LEXONI GJITHASHTU:

• Plagosje me armë zjarri në Gosë të Rrogozhinës, qëllohen burrë e grua
• Sekuestrohen kokainë, armë të ftohta dhe para, arrestohet 25-vjeçari në Durrës