Propozimet e PD për komisionet e reformës territoriale dhe zgjedhore

Janë zbardhur amendamentet e Partisë Demokratike për ngritjen e dy Komisioneve të Posaçëm për Reformën Zgjedhore dhe Reformën Territoriale. Duke iu referuar traditës parlamentare dhe rëndësisë që kanë këto dy reforma, PD kërkon barazi mes pozitës dhe opozitës.

Përkatësisht, për reformën zgjedhore kërkohet që komisioni të përbëhet nga 16 anëtarë, ku: 8 i përkasin Partisë Socialiste, 6 Partisë Demokratike, dhe nga 1 përfaqësues nga grupi parlamentar “Aleanca për Ndryshim” dhe grupin parlamentar të Partisë së Lirisë. I njëjti parim kërkohet të zbatohet edhe për Komisionin e Reformës Territoriale.

Gjithashtu, kërkohet ekspertizë nga institucionet ndërkombëtare, përfshirë këtu Kongresin e Autoriteteve Lokale dhe Rajonale të Këshillit të Europës.