Protestë në guroren e Rrajave, banori: Pse o deputet i zonës na prish shtëpitë

Kamera e Euronews Albania ishte këtë të shtunë në guroren e fisit Rraja në Borizanë të Krujës, ku banorët e zonës ishin mbledhur aty në një protestë për prishjen e banesave të tyre nga shpërthimet në kantier.

Në një prononcim për Euronews Albania, një nga banorët tha se shtëpitë e tyre janë shkatërruar dhe ata janë të pafuqishëm ekonomikisht për t’i rregulluar.

Banori kërkoi nga shteti që të jap lejet për guroret konform ligjit, duke respektuar distancat nga qendrat e banuara, pasi atyre po u shkatërrohet jeta.

“Këtë rastë me rrahjen e vëllezërve Maja dua të falenderoj mediat se ne na keni ndihmuar jashtë mase. Duhet t’i bëj thirrje shtetit, shikoni gjërat me detaje, mos jepni leje për para, jepni leje me kritere. Hajde shikoni gjendjen si është gurorja. Mua më është mërzitur jeta këto 6 muaj dhe dua t’i bëj një pyetje Rrahman Rrajës, i cili është nga Nikla, pse o mik, pse o njeri i lligjit, o deputet i zonës na, për 2 litra naftë që të iki kamioni pak më lartë që të hapi guroren, po na i prish shtëpitë. Distanca është shumë e afërt, mund të jetë afërsisht 150 m nga banesat. Janë 150 shtëpi këtu në fshat, ka 6-7 muaj që po punon gurorja”, tha banori.

Banoi shtoi se kryetari i bashkisë u premtoi kompensim të dëmeve përpara zgjedhjeve, ndërkohë që pas zgjedhjeve nuk u hap as telefonin.

“Janë çarë shtëpitë komplet, unë kam familjar invalid, edhe karrocën ma kanë fal se s’kam lekë. Kanë ardhur njerëzit kanë bërë inspektimet, por nuk kemi asnjë dëmshpërblim, prit gomar të mbijë barë. Kanë ardhur para votimeve dhe kryetari i bashkisë na tha se do t’i rregullojmë, pas zgjedhjeve nuk na hap as telefonin”, tha banori.

Kujtojmë se Rrahman Rraja dorëzoi mandatin e deputetit në qarkun e Durrësit këtë të shtunë, pas bërjes publike të videos ku pjesëtarë të fisit të tij rrihnin dy qytetarë në lokal, të cilët ishin ankuar në polici në lidhje me dëmet që i ishin shkaktuar në banesat e tyre nga shpërthimet te gurorja e Rrajave.

Në lidhje me ngjarjen janë shoqëruar në polici 8 persona, ndërkohë që janë shpallur në kërkim dy vëllezërit e deputetëtit, Xhelal dhe Përparim Rraja, si dhe i biri i tij Rexhep Rraja.

Në deklaratën e tij kur shpalli dorëheqjen nga jeta politike, Rrahman Rraja u shpreh se ndihet i turpëruar nga pamjet e publikuara dhe i bëri thirrje djalit të dorëzohet në polici.

Për të ndjekur kanalin e youtube të Euronews Albania KLIKO KËTU! 

LEXO GJITHASHTU:

• Rrahman Rraja dorëzon mandatin e deputetit: S’kam fjalë për të shprehur sikletin
• Policia thirrje Xhelal Rrajës të dorëzohet, shpallen në kërkim dy persona të tjerë
• “Ishin të armatosur”- Gazetarja: Rrajat shkuan me ‘regji’, donin ta filmonin dhunën