Protestë për mungesën e ndriçimit në Shkodër, banorët bllokojnë rrugën

Banorët e fshatit Hot i Ri në komunën Rrethina janë ngritur në protestë, duke bllokuar për afro 20 minuta rrugën që lidh Postribën me Shkodrën. Arsyeja kryesore e kësaj proteste, sipas banorëve është mungesa e ndriçimit në këtë rrugë në të cilën është investuar 7 vite më parë dhe ende nuk është marrë në dorëzim nga bashkia e Shkodrës .

Banorët u ulën në mes të rrugës në shenjë proteste duke bllokuar qarkullimin. Mungesa e ndriçimit dhe shpejtësia e madhe e lëvizjes së automjeteve sipas banorëve ka shkaktuar disa viktima ndër vite.

“Është realizuar 1 muaj ndriçimi i rrugës. Ka qenë një rrugë shumë e bukur. Që kur u fikën dritat kanë ndodhur shumë aksidente. Kërkojmë ndriçimin e rrugës”, shprehet njw prej protestuesve.

Banorët paralajmëruan përshkallëzim të protestave si dhe bllokim të mëtejshëm të rrugës nëse kërkesat e tyre nuk do merren parasysh.

Para 7 vitesh ky segment rrugor i u nënshtrua rikonstruksionit të plotë me ndriçim dhe me trotuare anësorë, ndërsa Bashkia Shkodër nuk e ka marrë në dorëzim këtë investim për shkak të problematikave të shfaqura.