Protestë në Tiranë në mbështetje të komandantëve të UÇK, kush pritet të marrë pjesë

Sot, nga ora 17:00 sheshi “Skënderbej” në Tiranë do të jehojë nga thirrjet për drejtësi ndaj ish-udhëheqësve të Ushtrisë Çlirimtare të Kosovës, të cilët mbahen në paraburgimin e Hagës.

Protesta me moton “Liria ka emër, drejtësi për çlirimtarët” në Tiranë pritet të jetë ndër më madhështorët ndonjëherë në përkrahje të krerëve të UÇK-së, me pjesëmarrje të qytetarëve, shoqërisë civile dhe figurave të njohura politike nga trojet shqiptare

Qytetarët nga të gjitha trevat shqiptare po mobilizohen për të marrë pjesë në këtë tubim të cilin e shohin si detyrim moral dhe kombëtar ndaj atyre që udhëhoqën luftën për liri e sot po mbahen padrejtësisht në Hagë.

Përkrahje për protestë kanë deklaruar politikanë të ndryshëm shqiptarë nga Kosova dhe Shqipëria, teksa nga Kosova pritet të nisen rreth 60 autobusë me qytetarë që do t’i bashkohen protestës në Tiranë.

Këshilli Koordinues i Asociacioneve Familjare të të Zhdukurve në Kosovë (KKAFZhK) gjithashtu do t’i bashkohet protestës mbarëkombëtare “Unë jam UÇK” e cila do të mbahet nesër në Tiranë, në përkrahje të çlirimtarëve, të cilët aktualisht po përballen me procese gjyqësore në Hagë.

Përmes një njoftimi për media, shoqatat anëtare të KKAFZhK dhe familjarët e personave të zhdukur shprehin mbështetje të plotë për organizimin e kësaj proteste, duke e konsideruar gjykimin e çlirimtarëve si të padrejtë dhe një devijim nga prioritetet themelore të drejtësisë tranzicionale në Kosovë.

Autoritetet në Shqipëri dje kanë deklaruar se ‘Rruga e Kombit’ do të jetë pa pagesë për qarkullim sot me 17 tetor për të gjithë qytetarët në shenjë solidarizimi me protestën.

Protestë në përkrahje të ish-krerëve të UÇK-së u organizua edhe në Prishtinë dhe në Hagë.

LEXONI GJITHASHTU:

• Protesta në mbështetje të UÇK-së, Rruga e Kombit pa pagesë më 17-18 tetor
• Protesta në Tiranë, Përparim Rama: Transport falas për veteranët e UÇK-së