Protestë për rrogat, 70 punonjëse të fasonerisë në Fier nuk paguhen prej 2 muajsh

70 punonjëse të një fasonerie në Fier kanë më shumë se 6 muaj që nuk paguhen ose paguhen vetëm pjesërisht për punën.

Në dy muajt e fundit ato nuk janë paguar fare nga pronari i fasonerisë, i cili i ka hequr edhe nga puna. Të ndodhur në këto kushte, ato janë ngritur në protestë për të drejtat e tyre.

Në vështirësi ekonomike e familjare, punonjëset e larguara nga puna kanë kërkuar njëzëri ndërhyrjen e institucioneve shtetërore për zgjidhjen e kësaj situate, pasi deri tani nuk ka pasur reagim.

“Më hoqën nga puna dhe më thanë do t’i marrësh kur të vijnë të tjerët. Unë deri tani nuk kam marrë asgjë. Është i detyruar me ligj që kur dikush largohet t’i shlyejë detyrimet. Kur nuk e gjejmë të drejtën edhe me ju atëherë ç’duhet të bëjmë ne? Nuk na kanë thënë që kanë falimentuar”, thotë një grua.

Në mbështetje të grave ishte edhe përfaqësuesi i Sindikatës së Punonjësve të Fasonerive Alfred Bushi. Ai tha se mosreagimi i institucioneve është i pajustifikueshëm dhe se punonjëset duhet të marrin të drejtat e tyre.

Nga ana e drejtuesve të fasonerisë ende nuk ka asnjë reagim për pretendimet e punonjëseve. Ndërkohë, këto të fundit shprehen se janë të vendosura t’i shkojnë deri në fund kauzës së tyre.

LEXONI GJITHASHTU:

• Fasoneria në krizë, Edvin Prençe: Rreth 200 punëtorë në javë dalin nga sistemi i punës
• Rritet deficiti tregtar, fasoneria ndikon negativisht në uljen e eksporteve