Rritet deficiti tregtar, fasoneria ndikon negativisht në uljen e eksporteve

Deficiti tregtar i vendit u rrit me 5.8% për vitin 2019 krahasuar me një vit më parë. Eksportet pësuan një ulje prej gati 4%, ndërsa importet u rritën krahasuar me vitin 2018.

Eksportet kanë pasur një trajektore rritëse që nga gushti i vitit që lamë pas, ndërsa importet u ulen. Megjithatë, krahasuar me nëntorin eksportet pësuan një ulje të konsiderueshme. Kjo, sepse edhe tërmeti i 26 nëntorit preku një numër biznesesh, sidomos ato të industrisë fasone.

Përkatësisht zëri për tekstilet dhe këpucët kontribuoi në këtë rënie, ndërsa impaktin më pozitiv e ka pasur industria nxjerrëse.

Rënia e eksporteve, sidomos ajo e energjisë elektrike dhe rritja e deficitit tregtar kanë dhënë kontributin e tyre në ngadalësimin e rritjes ekonomike, sipas Bankës Botërore. Rritja vjetore në 2019 për Bankën është 3.4%, nga 4.3% që kishte parashikuar Ministria e Financave dhe Ekonomisë.

Arsye të tjera që kanë ndikuar në rritjen e deficitit dhe uljen e eksporteve kanë qenë situata e paqëndrueshme politike që ka dekurajuar investitorët e huaj dhe rënia e euros. Një arsye tjetër që Banka Botërore përmend janë politikat kufitare që ka Shqipëria, që rrisin kostot për eksportuesit.