Provimi i Biologjisë kishte pyetje olimpiade, pretendon maturanti

Irdi Çollaku, gjimnazist te “Sami Frashëri” u shpreh se tre provimet e para kanë pasur nivelin e vështirësisë të shpërndarë dhe kanë qenë brenda programit mësimor.

Problemi ka qenë te Biologjia, që vetë Irdi ka marrë 9.9, por të tjerët kanë kundërshtuar notën dhe sipas tij me të drejtë.

“Provimi i Biologjisë për mua ka qenë me pyetje të cilat mund t’i krahasoj me të nivelit të olimpiadës pasi mora dhe pjesë në olimpiadën e gjimnazit dhe vura re që kishte pyetje të ngjashme,” – u shpreh nxënësi.

4 pyetje nga totali i provimit kanë qenë jashtë programit mësimor pretendoi ai, duke përjashtuar këtu pyetjet me alternativa të cilat i kishin mësuar gjatë gjimnazit.

Notën e tij të lartë, Irdi e arsyetoi duke treguar se ka marrë orë private jashtë mësimit dhe ishte i përgatitur për më shumë informacion se çfarë ishte rezervuar në programin e tre viteve shkollë.