Provokon Serbia, Kurti: Vuçiç ka sjellë ushtrinë pranë kufirit me Kosovën

Kryeministri i Kosovës, Albin Kurti ka shkruar në një postim në rrjetin e tij social në Facebook se Serbia ka lëvizuar trupat e saj rreth 50 metra afër vijës kufitare më Kosovën, veprim të cilin ai e ka cilësuar si shenjë provokimi.

Kurti ka sqaruar se në momentin e pikasjes së trupave dhe fotografimin e tyre, menjëherë ata janë larguar për në brendi të territorit të tyre.

Sipas tij, Serbia vijon të nxisë tensione duke synuar destabilizimin e territorit dhe rajonit.

Deklarata e Kurtit:

“Serbia sot ka provokuar sërish duke lëvizur trupat e saj rreth 50 metra afër vijës kufitare me Kosovën, në territorin e komunës së Kamenicës.

Institucionet përkatëse të sigurisë së Republikës së Kosovës kanë detektuar menjëherë këto lëvizje provokuese nga ushtria e Serbisë, të cilat kanë për synim nxitjen e tensioneve.

Kur e kanë parë që i kemi vërejtur dhe xhiruar, kanë ikur me shpejtësi e janë larguar për në brendi të territorit të tyre.

Qeveria e Republikës së Kosovës ka bërë investime të paprecedenta në ngritjen dhe përmirësimin e kapaciteteve të strukturave të inteligjencës, sigurisë dhe mbrojtjes, të cilat janë të gatshme për të parandaluar çdo kërcënim ndaj integritetit territorial dhe sovranitetit të shtetit tonë.

Sinergjia ndërmjet strukturave të sigurisë dhe mbrojtjes, si dhe bashkëpunimi me partnerët e aleatët rajonalë dhe ndërkombëtarë, përbën garanci për sigurinë në Kosovë.

Ndërkohë, Serbia vazhdon të nxisë tensione nëpërmjet veprimeve hibride, duke synuar destabilizimin e rajonit, megjithëse hapësira për këto manovra po i ngushtohet dita-ditës.

Kosova mbetet e palëkundur në rrugën e saj drejt integrimeve euro-atlantike, me institucionet e saj vigjilente 24/7, duke mbrojtur vendin e duke siguruar monitorim maksimal të situatës.”

LEXONI GJITHASHTU:

• Analisti amerikan: Kurti në të njëjtat pozita me Netanjahun dhe Zelensky
• Përballja Kurti-SHBA, gazetari Berisha: Po i shkojnë mesazhe të forta në zyrë