Pse iku PD nga komisioni, Bushati: Basha nën trysninë e ndërkombëtarëve

Partia Demokratike u largua sot nga mbledhja e Komisionit të Ligjeve dhe Këshillit të Legjislacionit, ku diskutohej për zgjatjen e afatit të vetingut, pasi kërkoi që mbledhja të shtyhet që të merren në shqyrtim propozimet për ndryshimet kushtetuese, mirëpo mazhoranca nuk pranoi.

Analisti Andi Bushati e cilëson si jo parimor qëndrimin e PD-së, që sipas tij po përpiqet të zgjidhë çështjet e reformave “përmes pazarit”.

Për ta ilustruar këtë, në emisionin “Shock”, Andi Bushati tha se PD nuk kundërshton zgjatjen e vetingut, por thotë se ka edhe PD disa propozime për ndryshime kushtetuese.

Kjo sjellje e PD-së vjen për shkak se kjo parti është sipas analistit nën trysninë e ndërkombëtarëve.

Nëse PD-ja sakrifikoi Sali Berishën për të mbajtur marrëdhënie të mira me Yuri Kimin, atëherë mund të bëjnë gjithçka tjetër, pasi do duket sikur e çuan dëm “sakrifikimin”, sipas Andi Bushatit.

“PD gjendet nën trysninë e ndërkombëtarëve. Ata llogarisin se vranë figurën e Sali Berishës që të mbajnë mirë marrëdhëniet me Yuri Kim”, u shpreh Andi Bushati.

Ndërsa analisti Baton Haxhiu tha për Sali Berishën se po çekuilibron demokracinë në vend.

“Demokracia në vend është paksa më e ekuilibruar, por po “kafshohet” nga Sali Berisha i cili është i lënduar ngaqë e shpallën non-grata”, tha Baton Haxhiu.