Pse të flisja për Shaqirin? Rama tregon pse nuk reagoi pas fitores së Zvicrës

Kryeministri Edi Rama ishte ndër të rrallët politikanë në Shqipëri që nuk reagoi publikisht pas fitores së Zvicrës ndaj Serbisë në Kupën e Botës, ku protagonistë ishin 2 shqiptarët Granit Xhaka dhe Xherdan Shaqiri.

I pyetur nga mediat për arsyet e kësaj heshtjeje, Rama u shpreh se nuk e pa të arsyeshme që të përdorte politikisht 2 figura që luajnë për një shtet tjetër duke i fryrë ‘zjarrit të një nacionalizmi qesharak’.

“Nuk e kuptoj pse duhet të flisja se nuk jam kryeministër i Zvicrës, jam i Shqipërisë. Nëse do ndaja nga skuadra kombëtare Zvicrës dy qytetarë zviceranë që kanë kombësi shqiptare, që janë shqiptarë të cilët ne i shohim me dashuri dhe simpati të madhe për një ndeshje të veçantë, çfarë do bëja? Do i përdorja ato figura për politikë dhe në një mënyrë aspak dinjitoze, sepse është ekipi kombëtar i një shteti tjetër dhe do t’i fryja zjarrit të një nacionalizmi, më falni për shprehjen qesharak. Por nacionalizmi është gjithmonë sa qesharak aq edhe i rrezikshëm. Nuk është e nevojshme, nuk e shoh të nevojshme dhe më duket që kush e bën këtë, nuk bën gjënë e duhur”, tha Rama.

LEXONI GJITHASHTU:

• Zvicra eleminon Serbinë nga Kupa e Botës, Xherdan Shaqiri protagonist me një gol
• VIDEO | Xherdan Shaqiri shënon ndaj Serbisë