Psikologia tregon se si mund të dallohen nxënësit që konsumojnë lëndë narkotike

Psikologia, Nereida Llaha thotë se ka dy kategori adoleshentësh që janë më predispozuar që të konsumojnë lëndë narkotike.

Sipas saj ata “janë adoleshentë që vijnë nga familje me dinamika familjare të cenuara” dhe “fëmijët që vijnë nga familje me statusi social-ekonomik mbi mesatar”.

Ajo tregon se ‘vëzhgon’ nxënës të caktuar gjatë ditës mësimore pasi konstaton sjellje ‘dyshuese’.

“Dyshimet e mia fillojnë kur nxënësit kanë probleme në sjellje dhe që reflektohen më pas në arritje akademike si dhe frekuentim të shkollës”, tregon Llaha.

Psikologia thotë se edhe pse mund të ketë shenja të dallueshme për konsum droge nga nxënësit ‘ndërhyrja në shkolla nuk është e thjesht pasi duhen ndjekur disa hapa’.

“Veprimi i parë është konsultë me mësuesen kujdestare. Nëse bindem për dyshimet bëj me dije prindërit dhe marr miratimin e tij për të marrë në këshillim nxënësin”, tha psikologia.

Nereida Llaha tregon se në shumicën e rasteve nxënësit refuzojnë dhe bëjnë rezistencë për t’u marrë në këshillim.