Pukë, besimtarët falin Kurban Bajramin në rrënojat e xhamisë së vjetër të Kabashit pas gati 60 vitesh

Pas gati gjashtë dekadash ndërprerjeje, në fshatin Kabash të Pukës u rikthye falja e Kurban Bajramit në rrënojat e xhamisë së vjetër të zonës, në një ceremoni simbolike që mblodhi banorë, besimtarë dhe emigrantë të rikthyer në vendlindje për festën.

Ceremonia fetare u drejtua nga myftiu i Pukës, Gëzim Kopani, i cili përcolli mesazhe paqeje, bashkimi dhe harmonie mes komuniteteve fetare.

Falja u zhvillua për herë të parë që prej vitit 1967, kur objektet e kultit u shkatërruan gjatë regjimit komunist. Rikthimi i ceremonisë në rrënojat e xhamisë u konsiderua nga banorët si një moment me vlerë historike dhe shpirtërore për zonën.

Në aktivitet morën pjesë jo vetëm besimtarë myslimanë, por edhe banorë të besimit katolik, duke ruajtur traditën e bashkëjetesës dhe respektit ndërfetar që karakterizon prej vitesh komunitetin e Kabashit.

Pas ceremonisë fetare, festa vijoi me rite tradicionale dhe takime mes familjeve të rikthyera nga diaspora, duke i dhënë fshatit një atmosferë festive dhe një gjallëri të munguar prej dekadash.

Rikthimi i faljes së Kurban Bajramit në Kabash u pa si një simbol i kujtesës historike, solidaritetit dhe lidhjes së fortë të banorëve me traditat fetare dhe kulturore të zonës.