Punonjësit e pastrimit në Fier protestë për pagat, Bashkia i kërcënon me largim

Dhjetra punëtorë të ndërmarrjes së pastrimit të zonave rurale në qytetin e Fierit kanë protestuar për rritjen e pagave dhe mungesën e kushteve të punës. Të indinjuar me pagesat minimale, ata shprehen se e kanë të pamundur të sigurojnë jetesën.

Veç rritjes së pagave, ata kërkuan edhe përmirësimin e kushteve të punës, pasi sipas tyre vështirësia e punës së tyre është e lartë ndikuar nga kushtet e motit dhe mjetet e punës. Gjithashtu shumica prej tyre nuk paguhen për orët shtesë në punë.

Punëtorët e pastrimit paralajmërojnë se nëse nuk merren parasysh kërkesat e tyre, ata do të vijojnë me pezullimin e punës dhe do të përshkallëzojnë protesta, ndërsa nga drejtuesit e Ndërmarrjes së Pastrimit përflitet se grevistët do të zëvendësohen.

Ndërmarrja e Pastrimit në bashkinë e Fierit ka 150 punonjës që paguhen me pagën minimale prej 40,100 (bruto) lekësh. Zyrtarët e bashkisë së Fierit mohuan problemet dhe pretenduan se kishin bërë një rritje page prej 2 mijë lekësh në muajin korrik.