Putin dekoron zyrtarin e lartë të burgut ku vdiq Navalny

Presidenti rus Vladimir Putin promovoi një zyrtar të lartë të burgut ku disa ditë më  parë ndërroi jetë kreu i opozitës ruse Alexei Navalny, raporton DPA.

Nënkryetari i administratës së burgut FSIN, Valery Boyarinev, u promovua në gradën e gjeneral-lejtnant të Ministrisë së Punëve të Brendshme.

Ivan Zhdanov, drejtori i Fondacionit për luftën kundër korrupsionit, i themeluar nga Navalny, shkroi të martën në kanalin e tij Telegram se Boyarinev ishte personalisht përgjegjës për torturimin e Navalny në burg.

“Kjo duhet të kuptohet si shpërblim i hapur i Putinit për torturën,” komentoi Zhdanov për promovimin e Boyarinyevit.

Në korrik 2023, urdhri i Boyarinev për të kufizuar aftësinë e Navalny për të blerë ushqime dhe nevoja ditore u bë i njohur gjatë një seance gjyqësore kundër Navalny.

Të burgosurit zakonisht mund t’i përdorin paratë e tyre për të plotësuar vaktet e tyre të pakta në dyqanin e burgut.