Putin forcon ushtrinë, 1/3 e shpenzimeve qeveritare për forcat e armatosura

Dy vjet nga nisja e asaj që e quan “operacion special” në Ukrainë, presidenti rus Vladimir Putin ka vizituar një impiant avionësh në rajonin e Kazanit dhe ka inspektuar një bombardues të ri të llojit “Tupolev-160”.

Rusia mund ta ketë nisur pushtimin e Ukrainës e papërgatitur, por sot Putin është i angazhuar në furnizimin e forcave të armatosura. Një e treta e shpenzimeve qeveritare pritet të shkojnë për ushtrinë.

Në Ukrainë, brigada e 13-të e Gardës Kombëtare ndodhet në vijën e frontit. Ofensiva ruse cilësohet si e pandalshme, me bombardime të vazhdueshme dhe avantazh në artileri.

Brigada ukrainase është në nevojë për furnizime, përfshirë medikamente, pajisje, municione dhe granata artilerie. Kievi vazhdon të presë për paketën amerikane të ndihmave që ka mbetur e bllokuar në Kongres.

Ndërkohë, raportimet e fundit nga OKB sugjerojnë se apeli për përmbushjen e nevojave të Ukrainës është plotësuar vetëm 10% për 2024-n.

Një zëdhënës tha se mungesa e fondeve po vë në rrezik njerëzit në nevojë. Kërkesa vjetore e OKB për vendin është 3.1 miliardë dollarë.