Putin: Konflikti midis Izraelit dhe Hamasit mund të përhapet përtej Lindjes së Mesme

Presidenti rus Vladimir Putin paralajmëroi se konflikti i Izraelit me Hamasin mund të përhapet shumë përtej Lindjes së Mesme dhe tha se ishte e gabuar që gratë, fëmijët dhe të moshuarit e pafajshëm në Rripin e Gazës të ndëshkohen për krimet e njerëzve të tjerë.

Gjakderdhja në rajon duhet të ndalet, tha Putin në një takim me liderët fetarë në Kremlin, raportoi Reuters.

Ai tha se u kishte thënë udhëheqësve të tjerë botërorë në biseda telefonike se dështimi për ta bërë këtë rrezikonte një konflikt shumë më të gjerë.

“Detyra jonë sot, detyra jonë kryesore, është të ndalojmë gjakderdhjen dhe dhunën”, tha Putin, sipas një transkripti të takimit të publikuar nga Kremlini.

Sipas Putin, përshkallëzimi i mëtejshëm i krizës do të ishte jashtëzakonisht i rrezikshëm dhe do të kishte pasoja shkatërruese, jo vetëm për rajonin e Lindjes së Mesme, por mund të derdhej shumë përtej kufijve të rajonit.

Ai beson se forca të caktuara po përpiqen të shkaktojnë përshkallëzim të mëtejshëm dhe të tërheqin sa më shumë vende dhe popuj të tjerë në konflikt.

Qëllimi, tha ai, ishte “fillimi i një vale të vërtetë kaosi dhe urrejtjeje reciproke jo vetëm në Lindjen e Mesme, por edhe shumë përtej kufijve të saj”.