Qarkullonte me pistoletë në Durrës, arrestohet 28-vjeçari! Rezultonte i dënuar për vrasje

Një 28-vjeçar është vënë në pranga nga Policia e Durrësit, pasi u kap duke qarkulluar i armatosur me pistoletë, ndërsa drejtuesi i automjetit ku ai udhëtonte është proceduar penalisht për moskallëzim krimi.

Operacioni policor i koduar “Pasagjeri” u finalizua nga shërbimet e Forcës së Posaçme “Shqiponja”, në kuadër të goditjes së rasteve të armëmbajtjes pa leje. Sipas policisë, aksioni u zhvillua pas informacioneve të siguruara në rrugë operative për një person që lëvizte i armatosur.

Gjatë ndërhyrjes në lagjen nr. 13 në Durrës, u ndalua një automjet me drejtues shtetasin A. L., ndërsa si pasagjer ndodhej shtetasi E. V., për të cilin kishte dyshime se mbante armë zjarri.

Gjatë kontrollit fizik, 28-vjeçarit E. V. iu gjet një armë zjarri pistoletë me municion luftarak, të cilën e posedonte pa leje. Në përfundim të veprimeve procedurale, ai u arrestua në flagrancë për veprën penale “Mbajtja pa leje dhe prodhimi i armëve, armëve shpërthyese dhe i municionit”. Sipas policisë, i riu rezulton i dënuar më parë për vrasje dhe armëmbajtje pa leje.

Ndërkohë, drejtuesi i automjetit, shtetasi A. L., 25 vjeç, banues në Shijak, u procedua në gjendje të lirë për veprën penale “Moskallëzimi i krimit”.

Arma e zjarrit u sekuestrua në cilësinë e provës materiale, ndërsa materialet procedurale i kaluan Prokurorisë së Durrësit për veprime të mëtejshme.