Qëllohet me armë zjarri në drejtim të karburantit në Tropojë

Një pikë karburanti në Tropojë është sulmuar me armë zjarri të mërkurën.

Policia tha se ngjarja ndodhi në Fierzë, ku në drejtim të pikës së karburantit dhe ambientit ndihmës, në pronësi të shtetasit Sh. D., 43 vjeç, banues në Fierzë, është qëlluar me armë zjarri, duke shkaktuar vetëm dëme materiale.

Shërbimet e Policisë, me marrjen e njoftimit,  shkuan menjëherë në vendngjarje dhe vijojnë kontrollin e zonës, për kapjen e autorit.

Ndërkohë, grupi hetimor në drejtimin e Prokurorisë, vijon punën për sqarimin e rrethanave dhe sigurimin e provave me qëllim dokumentimin ligjor të rastit.