Qëlloi me armë në ajër pas një konflikti me vëllanë, arrestohet 33-vjeçari në Dimal

Policia e Shtetit e njoftuar nga qytetarët në Dimal, ka ndërhyrë me shpejtësi duke parandaluar përshkallëzimin e një konflikti familjar që mund të kishte pasoja të rënda.

Në mesnatë, një 33-vjeçar ka qëlluar me armë zjarri në ajër në afërsi të banesës së tij në fshatin Goriçan, pas një konflikti me vëllanë e tij.

Menjëherë pas marrjes së njoftimit nga qytetarët, shërbimet e Stacionit të Policisë Dimal kanë reaguar me shpejtësi, duke neutralizuar dhe arrestuar shtetasin L. T., 33 vjeç, i cili dyshohet se ka vepruar në gjendje të dehur.

Në kuadër të operacionit të koduar “Telefonata”, Policia ka sekuestruar prova të rëndësishme dhe po vijon kërkimet për gjetjen e armës së përdorur në këtë ngjarje.

Në përfundim të veprimeve procedurale, shtetasi L. T. u arrestua në flagrancë për veprat penale “Mbajtja pa leje dhe prodhimi i armëve, armëve shpërthyese dhe municionit” dhe “Prishja e qetësisë publike”. Materialet hetimore i janë referuar Prokurorisë së Beratit për veprime të mëtejshme ligjore.

LEXONI GJITHASHTU:

• Sherr me thika dhe kosore në Dimal, 3 të plagosur, arrestohen babë e bir
• “Prodhimet bujqësore i hedhim në kanal”, fermerët e Dimalit drejt falimentimit