Qeveria e Kosovës shkarkon Bordin Mbikqyrës të Trepçës

Qeveria e Kosovës ka shkarkuar në mbledhjen e mbajtur mëngjesin e kësaj të mërkure, Bordin Mbikëqyrës të ndërmarrjes Trepça.

Gjatë bërjes publike të vendimit, ministrja e Ekonomisë, Artane Rizvanolli u shpreh se bordi aktual ishte jo funksional dhe kishte shkelur detyrat që i ishin caktuar.

Ministra e Ekonomisë së Kosovës bëri me dije se në drejtimin e kompanisë do të emërohet një bord i përkohshëm deri në zgjedhjen e një Bordi Mbikqyrës të ri.

“Bordi Mbikëqyrës i ndërmarrjes Trepça është themeluar me vendim të Qeverisë së Kosovë më 2 shkurt 2022, ku me 20 shtator kanë dhënë dorëheqje dy nga anëtarët ndërsa kanë mbetur tre anëtarë, pra aktualisht Bordi është jo funksional.

Njësia për Monitorimin e Ndërmarrjeve Publike ka konstatuar që Bordi ka shkelur detyrat dhe i ka propozuar Qeverisë së Kosovës si aksionare shkarkimin e këtij Bordi Mbikëqyrës. Andaj, propozoj shkarkimin e bordit ekzistues dhe emërimin e një bordi të përkohshëm, deri në zgjedhjen e një bordi të ri. Ky bord, mandatin nuk mund ta ketë më të gjatë se gjashtë muaj”,tha Rizvanolli.

LEXONI GJITHASHTU:

• Daçiç merr në mbrojtje Radoiçiçin: Video nuk është bërë ditën që ndodhi sulmi
• “Radoiçiç do bëhet Adem Jashari i serbëve”- Kurti: Çfarë na tha Vuçiç në Bruksel
• “Afrim Bunjakun e takova dy ditë para se të vdiste”-nipi i tij tregon se çfarë i tha