Thuajse gjysma e qytetarëve të Tiranës (44,3%) mendojnë se kryebashkiaku Erion Veliaj është një lider i fortë. Po aq kryeqytetas (42,3%) mendojnë se Veliaj është politikan i ditur.

Më pak se një në pesë (17,5%) qytetarë në Tiranë besojnë se Veliaj është i ndershëm. Thuajse aq janë edhe tiranasit që mendojnë se kryetari i bashkisë së tyre përkujdeset për njerëz si ta (18,3%) apo që i kthen fjalët në vepra (22,1%).

Mes atyre që kanë drejtuar bashkinë e Tiranës në 20 vitet e fundit, qytetarët preferojnë më shumë kryeministrin Rama (30,8%) e më pas kryebashkiakun aktual Erion Veliaj (25,3%). Vetëm 5% e qytetarëve të Tiranës mendojnë se kryebashkiaku më i mirë në dy dekadat e fundit ka qenë Lulzim Basha.

Dy në pesë qytetarë të Tiranës (40,5%) do donin ta shihnin përsëri kandidat të partisë Socialiste për bashkinë, kryebashkiakun Erion Veliaj.

Mes atyre që në zgjedhjet e vitit 2021 votuan Partinë Socialiste, Veliaj merr mbështetje dërrmuese për të rikandiduar për bashkinë Tiranë pas një viti.

Gjetjet janë të Barometrit në Euronews Albania, kryer nga MRB dhe DataCentrum në datat 15-25 Mars në nivel lokal të bashkisë Tiranë, me 1000 intervista ballë për ballë në familje.

LEXONI GJITHASHTU:

• Cilin lider pëlqejnë më shumë qytetarët e Tiranës?