Ra nga ballkoni apo u shty? Rihapen hetimet për vdekjen 30-vjeçares në Xhenova

Një ngjarje e rëndë ka tronditur Xhenovën natën mes të dielës dhe të hënës, ku Evelinndel Moori Chamorro, 30 vjeçe nga Peruja, humbi jetën pasi ra nga kati i gjashtë i apartamentit ku jetonte me partnerin e saj.

Hetuesit, nën drejtimin e prokurorit Giuseppe Longo, po shqyrtojnë mundësinë që viktima të jetë rrahur brutalisht përpara se të hidhej nga ballkoni.

Autopsia ka zbuluar dëmtime më të shumta sesa u raportuan fillimisht në vendngjarje – përveç një këmbe dhe një brinje të thyer, janë konstatuar edhe fraktura të tjera që shtojnë dyshimet për dhunë.

Partneri i saj, një 32-vjeçar italian, është vënë nën hetim për vrasje të paqëllimshme, si një hap procedural për të mundësuar përfundimin e hetimeve dhe për të emëruar një ekspert mjeko-ligjor.

Policia po merr në pyetje dëshmitarët dhe të afërmit e çiftit për të rindërtuar dinamikën e ngjarjes.

Në momentin e tragjedisë, në banesën e ofruar nga bashkia për emergjencën e strehimit ndodheshin edhe kunata e viktimës, bashkëshorti i saj dhe djali i tyre.

Një fqinj raportoi se kishte dëgjuar britma, zhurma mobiljesh dhe më pas një zhurmë të rëndë, që besohet të jetë momenti i rënies.

Autopsia, e kryer nga mjeku ligjor Davide Bedocchi, ka nxjerrë në pah lëndime që nuk përputhen me rënien e lirë.

Disa dëmtime mund të jenë të shkaktuara më herët, duke sugjeruar shenja të mundshme dhune. Analizat histologjike pritet të ndihmojnë në sqarimin e rrethanave.

Partneri, Marlo Stephano VC, ka mohuar akuzat dhe ka deklaruar se ishte viktima ajo që e sulmoi dhe kërcënoi se do të hidhej.

Megjithatë, ky version nuk mjafton për të sqaruar plotësisht çështjen ndërsa janë sekuestruar pamjet nga kamerat e sigurisë përreth zonës për të analizuar të gjitha lëvizjet.

Sipas nënës së të ndjerës, Evelinndel punonte si kujdestare dhe mbante familjen, ndërsa raportet me partnerin ishin të tensionuara, veçanërisht pas ndërhyrjes së kunatës në jetën e tyre të përditshme.

Autoritetet vijojnë hetimet për të përcaktuar nëse bëhet fjalë për një akt dhune në familje apo një tragjedi personale.

Vdekja e 30-vjeçares ka ngritur sërish pyetje të forta mbi sigurinë e grave në marrëdhënie të paqëndrueshme.

LEXONI GJITHASHTU:

• Tragjedi në Greqi, gruaja lind në shtëpi dhe ndërron jetë bashkë me foshnjën
• Mbeten në burg dy shqiptarët në Itali, u kapën me 15 kg drogë dhe 100 mijë euro