Dita e Dëshmorëve, Rama dhe Begaj kryejnë homazhe në ceremoninë përkujtimore

Në nderim të dëshmorëve dhe heronjve të popullit që sakrifikuan jetën për çlirimin e atdheut, u zhvillua sot ceremonia përkujtimore në Varrezat e Dëshmorëve të Atdheut.

Në ceremoni morën pjesë drejtues të lartë të shtetit, përfshirë kryeministrin Edi Rama, presidentin Bajram Begaj, zv.kryetaren e Kuvendit Klodiana Spahiu dhe ministrin e Mbrojtjes Ermal Nufi, të cilët vendosën kurora me lule duke u përkulur në shenjë respekti për sakrificën e dëshmorëve.

Dita e Dëshmorëve të Kombit shënohet çdo 5 maj, datë që përkon me rënien e Heroit të Popullit, Qemal Stafa.

Në këtë ditë përkujtohen me mirënjohje jo vetëm kontributet për çlirimin e vendit, por edhe sakrifica e të gjithë atyre që dhanë jetën për liri, demokraci, të drejtat e njeriut dhe dinjitetin e çdo shqiptari.