Rama: Dy kampionet olimpike të Kosovës do bëhen pjesë e Forcave të Armatosura të Shqipërisë

Distria Krasniqi dhe Nora Gjakova, fitueset e Medaljeve të Arta në Lojërat Olimpike të Tokios do të bëhen pjesë e Forcave të Armatosura të Shqipërisë. Vendimi është bërë me dije nga kryeministri Edi Rama gjatë mbledhjes së parë të qeverisë.

Z. Rama tha se kampionet olimpike kanë shprehur dëshirën të jenë pjesë e FA shqiptare, ndërsa shtoi se nga Ministria e Mbrojtjes do të nisë puna për krijimin e një njësie speciale të kampioneve, në mënyrë që të përfitojnë një status të veçantë për gjithë jetën.

“Vendimi për përfshirjen në strukturat e Forcave tona të Armatosura të dy fitueseve të medaljeve të arta në lojërat Olimpike të Tokio, Distria Krasniqi dhe Nora Gjakova të cilat kanë arritur diçka që është e jashtëzakonshme dhe po ashtu kanë shprehur dëshirën që t’i bashkohen FA të Shqipërisë. Dhe këtu dua të shtoj se me ministrin e Mbrojtës jemi duke punuar që në FA e Shqipërisë të krijohet një njësi speciale e kampionëve, që meritojnë të trajtohen gjithë jetën me një status të veçantë. Nga përvoja e vendeve të tjera këtë status të veçantë kampionëve ua jep përfshirja në FA dhe nga ana tjetër të jenë aty shembuj rrezatues dhe mentorët e të rinjve me uniformë”, tha kreu i qeverisë.

LEXONI GJITHASHTU:

• Qeveria ‘Rama 3’ betohet para Presidentit të Republikës
• Rama mbledh qeverinë dhe u kërkon ministrave zbatimin e kodit etik: Nuk ka udhëtime luksi e dhurata