Rama: Kërkova në Madrid që Kosova të përfshihet në mekanizmin për paqe

Kryeministri Edi Rama ka treguar detaje nga samiti i NATO-s që zgjati 3 ditë në Madrid të Spanjës.

Këtë të premte në një konferencë për mediat nga Kryeministria, ai shpreh se pala shqiptare kërkoi që Kosova të përfshihet në mekanizmin e partneritetit për paqe.

“Ne kemi kërkuar që Kosova të përfshihet në mekanizmin e partneritetit për paqe, një stad tjetër i marrëdhënieve me NATO-n. Kemi dhënë të gjithë argumentet përkatëse dhe është e udhës që e gjithë aleanca të kuptojë se pavarësisht mosnjohjes së Kosovës nga disa prej vendeve, kjo nuk është një kohë e zakonshme. Si një kohë e jashtëzakonshme kërkonte dhe akte të jashtëzakonshme. Kosova, pavarësisht se Ukraina nuk e njeh, ka mbajtur një qëndrim të qartë duke treguar maturi të rëndësishme si shtet në raport me detyrimet ndaj gjithë kësaj familje të madhe që Kosova e ka të lidhur pazgjidhshmërisht fatin e saj”, tha Rama.

Ai shtoi se Serbia duhet të mbahet më afër me frontin kundër agresionit rus.

“Një fokus të veçantë ka pasur për Ballkanin Perëndimor, për kompleksitetin e rajonit dhe për vulnerabilitetin që rajoni ka për arsye të faktorëve të njohur, qëndrimi ynë ka qenë i njëjti, i njohuri dhe i përsërituri lidhur me domosdoshmërinë që Serbia të mbahet sa më shumë dhe sa më afër me frontin kundër agresionit dhe presioni mbi Serbinë të mos shkojë në një krisje që mund të ketë pasoja të pallogaritshme për vetë rajonin”, shtoi ai Rama.

LEXONI GJITHASHTU:

• Maqedonia e Veriut do e pranojë pa hezitim propozimin francez, sipas Ramës