Rama: Nga qershori do të ndalohet me ligj përdorimi i qeseve plastike

Kryeministri Edi Rama tha se nga 1 qershori i vitit të ardhshëm do të ndalohet me ligj përdorimi i qeseve plastike. Gjatë prezantimit të programit qeverisës në Kuvend, kryeministri u shpreh se mbrojtja e mjedisit do të ketë një vëmendje të veçantë gjatë këtij mandati.

Kreu i qeverisë paralajmëroi se nuk do të ketë asnjë lëshim për prodhuesit e qeseve plastike dhe do të do anulohet të gjithë lejet për të grumbulluar mbetje të riciklueshme në kazanët e plehrave.

“Në qershorin e vitit tjetër ndalohen përfundimisht qeset plastike. Nuk do të ketë asnjë tolerancë. Nuk jemi të parët që e bëjmë, duhet ta kishim bërë me kohë. Mesazh im për industrinë që prodhon qeset plastike është që të mos kërkojnë lëshim sepse kjo është një dëm për të ardhmen e vendit. Shqipëria nuk është një vend i pasur por nuk mund të jetë absolutisht një vend i papastër. Do të anulohen lejet dhe licencat absurde për të ricikluar mbetje kazan në kazan, duke ndotur mjedisin. Mos kërkoni lëshime nga qeveria. Dita e fëmijëve, 1 qershori, do të jetë dita e çlirimit nga qeset plastike”, tha Rama.

LEXONI GJITHASHTU:

• Rama i drejtohet PD-së: Jemi gati për çdo lëshim që ju doni
• Si kanë ndryshuar ministritë në 3 qeveritë Rama