Rama: Nuk la akuzë pa fabrikuar ndaj meje, i kam fituar të gjitha gjyqet me Berishën

Kryeministri Edi Rama në një videomesazhi të gjatë të dielën e cilësoi kundërshtarin e tij politik Sali Berisha si “katranin më të madh të vendit që prej çerek ka fabrikuar akuza të paqena ndaj tij dhe familjarëve të tij”.

Rama tha se ka fituar 11 gjyqe me Berishën dhe 7 të tjerë janë në pritje.

“Më kanë bërë përdhosës të familjes time, duke më akuzuar se në gjyqin e divorcit, unë kam akuzuar gruan time se djalin tim e kishte me babain tim. Jo, divorci im, qysh në fillim të viteve ‘90 s’ka pasur asnjë konflikt dhe asnjë pretendim të ndërsjellë. Përkundrazi, ka qenë tërësisht paqësor. Ndërsa po, siç është provuar më pas, katrani i madh ka fabrikuar një dokument gjyqi dhe e ka publikuar  asokohe, për ta mbështetur me një provë të rreme atë akuzë, që qoftë edhe thjesht për ta imagjinuar, duhet të jesh egërsirë, jo njeri; lëre pastaj të jesh udhëheqës i popullit. Më kanë bërë homoseksual, biseksual, transeksual. Edhe mund të kisha qëlluar një nga të tria këto ose dhe të tria bashkë.

Po jo, Zoti më ka përcaktuar si heteroseksual dhe nuk kam pasur kurrë kuriozitet ta pyes si e bën Ai përzgjedhjen për prirjen seksuale të njerëzve! Më kanë bërë dhunues grash, madje dhunues të ndjesë pastë nënës time. Më kanë bërë përdorues droge. Jo, nuk jam përdorues droge ose më saktë, nuk kam përdorur ndonjëherë droga të paligjshme. Më kanë dalë e vazhdojnë të më teprojnë dy droga çudibërëse për mua: Arti, i pandashëm nga unë, qysh nga fëmijëria. Dhe lufta politike, e pandashme prej meje, qyshse e ndava mendjen t’ia kushtoja këtë pjesë të jetës sime, ndryshimit të Tiranës, e më pas të Shqipërisë. Më kanë bërë kriminel. Jo, nuk kam kryer kurrë një krim dhe nuk i kam duart të ndotura, as me gjak, as me drogë, as me para të pista, e as me rrahje e kërcënime kundërshtarësh në politikë a në media”, tha mes të tjerash Rama.

LEXONI GJITHASHTU:

• Rama dhe Koçiu në Poliklinikën e re në Shkodër: Përfitojnë 200 mijë qytetarë
• “Drejtësia foli me prova”, Rama: Im vëlla u përdor si mish për top për të më goditur