Rama pas mbledhjes në Shkodër: Të rritet performanca në të gjitha bashkitë

Kryeministri Edi Rama ndodhet në Shkodër ku po zhvillon një mbledhje 2-ditore me kryebashkiakët dhe ministrat.

Në një deklaratë për mediat pas mbledhje, Rama theksoi se u diskutuan një sërë temash të rëndësishme që kanë të bëjnë me përshpejtimin e procesit të modernizimit të qeverisjes në të dyja nivelet dhe të rritjes së cilësisë së kapitalit njerëzor.

Rama kërkoi rritjen e performancës në të gjitha bashkitë me qëllim zvogëlimin e hendekut që ekziston në disa prej tyre, ndërsa premtoi rritje pagash për punonjësit e bashkive në të gjithë vendin.

“Diskutuam për tema të rëndësishme që përbëjnë edhe pikat e referimit për ecurinë e procesit të anëtarësimit në BE pasi është një proces që siç e kam thënë shpesh kërkon angazhimin, këmbënguljen dhe rezultate nga të gjithë, jo thjesht nga qeveria. Sepse nuk integrohet qeveria në BE, por Shqipëria. Kjo do të thotë që puna e qeverisë është shumë e rëndësishme, por është vetëm një pjesë e punës. Jemi në nevojën e madhe të rritjes së ritmit, përshpejtimit të procesit të modernizimit të qeverisjes në të dyja nivelet dhe të rritjes së cilësisë së kapitalit njerëzor. Kemi disa sfida me rëndësi, nga të cilat ajo e përfarimit të njësive të pushtetit vendor me mbështetjen nga qeveria, sfidën e një mesatareje të arsyeshme të performancës në të gjitha bashkitë, pasi ka ndryshime por me diferenca ndonjëherë të forta, rivlerësimit të nivelit të pagave të bashkive”, tha ai.

LEXONI GJITHASHTU:

• Kryeministri Rama mbërrin në Shkodër, takim me ministrat dhe kryebashkiakët
• Investimet e reja në Berat, Rama inspekton punimet në sheshin e qytetit