Rama: Po, kam ngrënë darkë me McGonigal dhe më ftoi ai

Ndërsa kryeministri Rama mbante fjalën e tij në Kuvend, opozita reagoi nga vendi duke shkaktuar zhurma në sallë.

Në këto kushte kryeministri kërkoi ta dëgjonin duke qenë se prej kohësh kanë kërkuar praninë e tij në sallë dhe sqarime për çështjen McGonigal.

Nga foltorja Rama foli dhe për darkën që ka ngrënë me ish-zyrtarin e FBI-së në New York.

“Jemi te hera e nëntë, pika 37, faqja 8. Në dhjetor 2017, McGonigal darkoi në New York City me personin A dhe kryeministrin e Shqipërisë. Po, e vërtetë është, hëngri darkë me mua dhe më ka ftuar ai në darkë dhe jo unë atë, sepse në Shqipëri e ftoja unë atë, në New York më ftonte ai mua dhe ku është këtu krimi apo kompromentimi që kam ngrënë darkë me shefin e kundër-inteligjencës?” – tha Rama.

Seanca maratonë e kësaj të enjteje pritet të zgjasë gati 24 orë. Do të zhvillohet mocioni me debat për kryeministrin Edi Rama sa i takon çështjes McGonigal.

Grupi parlamentar i PS-së do të ketë 750 minuta në dispozicion ndërsa PD-ja do të ketë 350 minuta.

LEXONI GJITHASHTU:

• “Hetimi s’ka lidhje me mua”, Rama sqaron pikat në dosjen e McGonigal
• Rama ironizon: Nga revolucioni me 200 mijë njerëz jam fshehur disa herë në Dajt