Rama: Shqipëria bëri uljen e parë të çmimit të energjisë elektrike në 35 vite

Në një konferencë për shtyp të mbajtur sot së bashku me Ministren e Infrastrukturës dhe Energjitikës, Belinda Balluku, kryeministri Edi Rama njoftoi se nga data 1 shkurt, çmimi i energjisë elektrike do të ulet për konsumatorët shqiptarë.

Rama theksoi se kjo është ulja e parë e çmimit të energjisë elektrike në Shqipëri në 35 vite. Kryeministri tha se kjo ulje është pjesë e një plani strategjik të mirëmenduar, i cili është përgatitur dhe diskutuar me ekspertë të brendshëm dhe ndërkombëtarë. Plani ka në fokus sigurinë e plotë energjitike dhe kthimin e Shqipërisë në një eksportues neto energjie deri në fund të mandatit të katërt qeveritar.

Rama theksoi se kjo ulje është gjithashtu një reflektim i angazhimit të qeverisë për të ndarë me qytetarët frytet e reformave të dhimbshme që janë realizuar gjatë viteve të fundit. Ai gjithashtu njoftoi se ekonomia e Shqipërisë po shkon drejt një rritje të parashikuar prej 4% për vitin 2025.

Në një tjetër moment të fjalës së tij, Rama u ndal edhe tek zhvillimet e energjisë diellore në Shqipëri. Ai theksoi se vendi ynë është lider në rajon për vetëprodhimin e energjisë solare, duke prodhuar aktualisht 196 megavat energji elektrike nga subjektet private, familjarët dhe bizneset ndërsa në vend të dytë renditet Serbia me 51 megavat, pasuar nga Kosova, Maqedonia e Veriut dhe Mali i Zi me shifra më të ulëta, prej 14-18 megavat.

“Sot, Shqipëria prodhon 10% të energjisë së saj nga dielli”, tha Rama, duke nënvizuar rëndësinë e diversifikimit të burimeve të energjisë dhe të qëndrueshmërisë energjitike për të ardhmen e vendit.

Enti Rregullator i Energjisë miratoi këtë të mërkurë uljen e çmimit të energjisë elektrike për konsumatorët familjarë që do jetë në fuqi nga 1 shkurti deri me 31 dhjetor të vitit 2025. Për konsumin deri në 700 kWh pagesa do të jetë 8.5 lekë kilovati, ndërsa mbi 700 kWh 9.5 lekë/kilovati.

LEXONI GJITHASHTU:

• Ulet çmimi i energjisë elektrike për familjarët, çmimi i ri duke filluar nga shkurti
• Në shkurt ulet çmimi i energjisë! ERE shqyrton kërkesën: Kush përfiton